今日是元旦，先祝馬迷有個好開始。正所謂好的開始是成功的一半，相信馬主們都喜歡攞頭威。當然，個個都想贏馬，除要講馬匹實力，通常又以大馬主會較着數，皆因練馬師會特別落力交代。近日馬圈的大新聞是高伯新兵變，且看他能否在新一年即洗頹風，省一省招牌吧！
事實上，近期所見，不少較落後的倉主都發動攻勢，今次賽事，但見李易達、文家良、鄭俊偉都有實力馬應戰，前者今季暫時只得四W，距離達標數尚有十一場，雖然馬季尚有七個多月，但照計數的話，三分一季才贏四W，按進度到季尾會不夠數，想保住牌照定不能怠慢。大馬房方面，蔡約翰、大摩都話今日有信心。至於剛戰蘇偉賢連場熱門馬無影，且看今日會否回馬槍。
騎師當中，潘頓話明今日有信心做騎師王，而黑馬當中，剛開齋的巴度騎足十一場，早已指出他得到不少練者賞識，當有力再交出成績，而莫艾誠的座騎亦有冷味。
心水方面，「美麗寶寶」難得遇到弱組，排到好位在B+2跑道會賺形勢。其實，馬主今季加強與大摩合作，但暫時成績未算太好，而上次「美麗傳承」初出跑第二算有交代，亦大有機會是爭打吡的主角。不過，大摩最實際還是要先贏馬交代，所以「美麗寶寶」今日必然盡力助馬主攞威。而馬主郭生向來對騎練都甚豪氣，大摩定更賣力。
另外，「四季」系的馬主羅亦以慷慨見稱，而「四季旺」今日確有條件添食。此駒初出一役受阻，再次上陣增程即成熱門，當時筆者很不看好，因為睇得太多此類熱門倒灶的例子，最終證明筆者看錯，亦反映出其實力超級，所以熱門都贏！而從上次牠贏馬的姿態來看，今仗連捷無難度吧！
珊翠絲 開門見珊
